नयनांत लालसर हेवा

ओठात गुलाबी दावे

आज काय म्हणुनी आले

गालांवर रुसवे फुगवे

मी कट्टी-फू तुजसंगे

असे पुन्हा पुन्हा का म्हणसी

निश्चय करिसी अबोलण्याचा

पुन्हा पुन्हा का फिरसी

हीच भावना खरी तरीही

तू का रागे भरसी खोटे

मी हसुनी दावी मग का

पुन्हा दु:ख तुला ते वाटे

विश्वास आहे हे म्हणसी तरीही

युवती मत्सर दाविसी का

विचार तुझा हा सवतीचा मग

मलाच दोषी धरिसी का

हे रागे खोटे भरसी तरीही

हृदयी दु:खी अससी

हे कावे माझे कळून तरीही

वेडे पुन्हा फससी