कंठ दाटे नीर नयनी |

तुकयामुर्ती येता ध्यानी ||१||

गर्जू तुकयाचे नाम |

काळा सोडू भंडावून ||२||

गाऊ ऐकू पाहू तुका |

आणिका झालो बहिरा मुका ||३||

बुडलो असतो मी ते वेळे |

तुकारामे वाचविले ||४||

भाकू तुकयाचे आर्त |

तोची आयुष्याचा अर्थ ||५||

त्याची भाकावी करुणा |

जेणे दिधले जीवना ||६||

तुकाराम तुकाराम |

गाता शांत होई मन ||७||

तुकाराम झाली काया |

कामक्रोध गेले लया ||८||

तुकाराम बोलू वाचे |

आणिक धन नाही साचे ||९||

मणी तुकया घाली साद |

हा तो तुकयाचा प्रसाद ||१०||