मज जाणवावे जे असे

ते जाणिवेपल्याडले

जेथ शब्दा नाद स्पर्श

श्वास अन गंधाळले

मज नेणिवेचा विसर नको

अन जाणिवेची जाण हवी

ऐहीकाची शाश्वताला

जोडणारी नाळ हवी

चिदाकारले चित्त हवे मज

गलबलणारे मनही हवे

विशुद्ध चैतन्याच्या बागा

अवनीवरती मनू नवे

सोंगाडी मी होऊ कसा

अन मुखवट्यात मी राहू कसा

सोंगाची मज सवय नको रे

ओळख मजला मीच असा

उरात कोरड नको उमाळे

हृदयाहृदयी बंध हवे

प्रेम विशुद्ध, नको आसक्ती

आनंदाचे मार्ग नवे