मनगट अजुनी कोवळे

ना आधार कुणाच्या हाताचा 

परिस्थितीवर पाय देऊनी

किल्ला बांधतोय स्वतःचा

घडवतोय एक एक चिरा

आणि घडतोय स्वतःही

भविष्यात हे चिरे फिरवतील

माझ्या विचारांची द्वाही

जगरहाटीत राहून

मी बदलू पाहतो जगाला

दगडावरती तासत बसलो

दगडाने मी दगडाला

आहे रानी एकटाच

सोबत निशब्द शांतता

काम माझे वेगाने

आरामाला संथता

यशापयश मनात भीती

उधळलो तरी चौखूर

ऊन आहे सोबतीला

प्रकाश आहे दूर दूर