जाणवे ना या जीवाला

दु:खितांच्या वेदना

क्षीण झाला कळवळा

भ्रष्ट झाल्या भावना

पीडितांची क्षीण गीते

हे मना मज ऐकू दे

जाणवे ना जे जगाला

त्याची मजसी जाण दे

कामी येई दु:खीतांच्या

श्वास मजला दे असा

शोषितांच्या आर्ततेचा

ध्यास मजला दे वसा

सज्ज ठेवी सेविण्याला

असाच देवा प्राण दे

साह्य करी जो जिंकण्या

अमोघ मजला बाण दे

हात आहे मानवाला

वासना देण्याची दे

विश्व भरले हे सुखाने

पाहण्याची दृष्टी दे