कराल माझ्या जीवनघराचे

जरा किलकिले दार

आवडत्याशी युद्ध म्हणुनी

नावडत्याशी संसार

आवडत्याशी युद्ध असे की

आयुष्याशी तडजोड

युद्ध कुणाशी करायचे जो

तळहाताचा फोड

मात्र दुखऱ्या असती बहुधा

नाजूक साऱ्या गोष्टी

लाव्हा असतो पोटी आणि

बहरून येते सृष्टी

उसवून साऱ्या आठवणी

मी रात्री जागत बसलो

सापडल्या ना गोष्टी ज्यांची

वाट पाहुनी फसलो

ध्यानस्थ अंधार मी

ती उजेडाचा सोहळा

त्यागला मी त्वरे जेव्हा

सूर्य तिने सांडला