चला चला खिडकीजवळ

पाहू कोण बसतं, फिरू मुंबईत मस्त ||धृ||

इ-इ-इमारत ना मम्मी ? बघ ना कित्ती उंच

कुणाचं बरं खेळणं एवढं मोठ्ठ काचेचं ?

सांग ना ग पटकन कुणाचं हे खेळणं

पुस्तकातल्या परीचं की काळ्या मोठ्या राक्षसाचं

पप्पा मला पाळण्यात न्या ना ओ बसायला

हट्ट नको करू म्हणे सांगा ना या मम्मीला

घाबरतेस किती अगं सोड ना हात माझा

नको आता मला तुझे आईस्क्रीमपण खायला

तो बघ टपटप टांगेवाला भूम भूम पळतो

अंकलिपीत हलत नाही आता लबाड धावतो

मम्मी मम्मी याचं नाव बाप्पालाच सांगूयात

मग कसा देवबाप्पा त्याचे कान कापतो

अय्या किती गोरा किनई तो बघ माणूस तिथे

किती गं वेळा मम्मी त्याची त्याला पावडर लावते ?

हाहाहा तो बघ त्याच्या मागचा खोडकर मुलगा

त्याची मम्मी त्याला नुसतं उन्हात उभं करते

शी बाई किती आवाज काचेतून पाहू दे ना

पैसे मागायच्या खेळांत मला पण जाउ दे ना

कुठे पळतात किती धावतात का गं एवढी घाई

माझ्याएवढी मुलं उन्हात कशासाठी सांग ना

अगबाई केवढ पाणी कुठल्या नळातून येतं गं

एवढा मोठा बाथ टब मला सुद्धा हवा गं

कट्टी घेईन नाही आणून दिलास जर तू मला

एवढं पाणी हवचं माझ्या सगळ्या बाहुल्यांना गं

मम्मी मम्मी झाडे बघ कशी मागे पळतात

डिस्कवरीतल्या सापासारखे रस्ते कसे वळतात

चल खाली उतरुया मला रस्त्यावर झोपू दे

इतका वेळ सोबत केली त्या आकाशात पाहू दे