आठवण तुझी सूर अनाहत होणे

लय ही सोडून ताल भरकटत जाणे

आठवण तुझी सोनसळा तारांगणे

टिपूर ओतले त्यात पुनव चांदणे

आठवण तुझी सरी  मधाच्या मधाळ

वेडी धुंद रात्र तिला सुगंधी पाल्हाळ

उबदार तुझी काया दुधापरीस दुधाळ

त्यात अखंड बुडाले माझे मन हे ओढाळ

तुझ्या केसांत केवडा आणि गाली ग जास्वंद

ओठी गुलाबाची कळी करी फुलताना धुंद

मी सडा प्राजक्ताचा तू धरणीचे अंग

कमलांगे सुखावला भ्रमर प्राशुनी मकरंद

माझे सुख तुझ्या सुखी सांग कसे मी पाहतो

तुला सुखी पाहताना सुख माझे मी मानतो

मार्ग तुझ्या सुखाचाही मला सुखाचा भासतो

म्हणूनिया त्याच्यावर मी आनंदी चालतो