मोहे पावा मना विसावा

कान्हा परते घरी ||धृ||

लाल आभाळी कातरवेळी

ऐकू येई धून सावळी

वनावनांतून कर्णफुलांतून

वाजवितो बासरी ||१||

भान हरपले या गोविंदे

वळीतो गोधन नाना छंदे

पाठीवरुनी हात फिरवितो

गाईंच्या मुरारी ||२||

गाईसंगे सैर धावितो

उड्या मारितो खोड्या करितो

भान विसरले गौळ-गौळणी

कौतुक करिती सारी ||३||

पक्षी ते घरट्यात परतती

आतुर गौळणी मनात हसती

दिवे लावूनी निमित्त करुनी

द्वाड पाहती हरी ||४||

लागली चाहूल यशोदा धावे

हरी पाहता हृदय सुखावे

सुंदर बाळा तुझ्यावाचुनी

क्षण न राहवे दुरी ||५||