जवा बाप घाव घाली

ठिणग्या उडती ठिकऱ्या

त्याच्या काळ्या छायेमंदी

माय भाजते भाकऱ्या

माझा बाप काळा काळा

त्याची आडदांड छाती

करपल्या उन्हामंदी

त्याचं दंड चकाकती

शीक पडला कितीही

अंगी भणाणला ताप

चिवट खडक घणाशी

झुंज घेई माझा बाप

नाही बुक तो शिकला

तरी शिकवी आमाला

दोघांच्याबी फियासाठी

बाप फोडी दगडाला

 कष्ट पाहुनिया त्याचं

नभी सूर्य झेकांडला

तापल्या त्या त्वचेवरी

घास आमचा शिजला

त्याच्या सर्वांगी निथळं

उन्ह घामाचं ते पाणी

चरचरं दगडावरी

गात नवेलीची गाणी

-दामुशक